"الولد مش بياكل...البنت مغلباني في شرب اللبن"
خلونا نتكلم في طبق اليوم...قصدي في الأكل الصحي للأطفال.
ده كائن بيتعلم باللعب...خصوصا في السن الصغير.
ومش لازم ياكل بالطريقة اللي أحنا عايزينها...المهم إن الفائدة الغذائية توصل له.
وعلشان تعرفوا إني مش بتكلم في خيال علمي.
ابني الصغير ما بياكلش أي خضار نهائي...فجأة كده قرر.
ممكن ياكل فاكهة...لكن مستحيل ياكل خضار...خصوصا المطبوخ.
نعمل إيه؟
الأم العظيمة اللي تعرف تلف وتدور
حوالين القصة دي.
فمثلا زوجتي أكرمها الله...بتعمل له
مخبوزات فيها خضراوات.
وبتعمل له كيكة بالكوسة.
تعرفوا تعملوها دي؟
المهم إنه ما يحسش إن الأكل فيه
خضار...والأهم إن الغذاء المطلوب يوصله.
يعني مش لازم ياكل ويقولك نفسك حلو
قوي في الطبيخ يا ناريمان يا أختشي.
وتقدروا ترجعوا للمقال الثالث في
تربية الأطفال...اللي هو بتاع أشكال الأكل..وإزاي نبرمج بها الأطفال.
شرب اللبن
بيمثل مشكلة لناس كتير ... نعمل إيه؟
حماتي أكرمها الله...عودت أولادي من
صغرهم على الشعرية باللبن.
ولادي في مصر...في الهند...في
السند...يعشقوا حاجة اسمها شعرية باللبن.
مش لازم أولادكم يحبوا الشعرية باللبن
هم كمان.
جربوا معهم كذا حاجة لحد ما توصلوا
لحاجة بيحبوها.
مثلا الكورن فليكس...اختاروا نوع صحي
كده ونضيف...وما فيش فيه مواد حافظة أو ألوان صناعية.
جربوا معهم اللبن مع الفواكه ... لبن
مع شوية كاكاو.
وشوية حركات بقى على الوش.
زي ما بتعملي قلوب على النسكافية
لنفسك...يا ناريمان يا أنانية !
وحبيبك بقى في القصة دي هو الخلاط.
ما فيش عندكم خلاط...بيعي السجادة
وهاتي خلاط.
كل الأكل كوم...وأكل الشيبس والمياة
الغازية والبلاوي السوداء دي كوم تاني
!
ابنك مش بيرضى ياكل وعلطول نفسه
مسدودة؟
ما هو علشان أكل الحاجات المضرة صحيا
دي.. !
طب أعمل إيه يا خويا...؟
ابتكري بدائل بقى يا أختشي.
عارفة الأكياس البلاستيك بتاعت حفظ
الأكل...اللي بتتقفل دي.
طب ما تجيبلنا كيسين الله يكرمك.
قصدي أملي الكيس...بأي أكل صحي.
زي الكورن فليكس ...هاتي نوع مفيد
ومغذي وما فيش فيه ألوان صناعية.
كل حاجة كورن فليكس...؟
بلاش...هاتي له شوية ذرة مشوي وفرطيه
في الكيس.
أو شوية فاكهة مجففة مثلا....أو أعملي
كوكيز صغيرة...أو كحك صغير.
أو هاتي شوية فول سوداني
وحمصيه...وأعملي شغلك بالكاكاو والعسل.
وحطي فيهم الفول السوداني...بحيث يطلع
زي الحاجات اللي في أكياس الجاهزة.
أو أي افتكسات من طرف سيادتك.
أنا مش بفضل الأكل المقلي للأطفال زي
ما بعض الناس بيقترحوا...نعمل بطاطس مقلية وشوية ملح وتوابل...ونحطها في الكيس.
لكن ممكن تجربي.
على الأقل هتبقى أنضف من المواد
الحافظة والألوان الصناعية ومكسبات الطعم.
أعملي أنت الكلام بتاعك...هيبقى طازة
ونضيف.
وممكن أقولك اختراع تاني.
هيساعد على تنمية اعتماد الطفل على
نفسه كمان ويحببه في الموضوع.
هاتي له ورقه يرسم عليها...وألزقي
الورقة دي على الكيس قبل ما تمليه.
ولو الطفل صغير ارسمي أنتي...أرنوب،
وردة، فجلة...أي حاجة.
بس الأفضل خليه هو يرسم
وقولي له أنكم أنتم الاتنين هتعملوا
مصنع شيبس جديد.
وإن هو المهندس اللي بيعمل تصميمات
الأكياس.
مبروك يا مدام...ابنك بقى رجل أعمال !
المياة الغازية...والعصائر المحفوظة
اللي فيها مواد حافظة وألوان ومكسبات طعم صناعية...عرفاهم؟ ... خطر !
زوجتي مثلا بتجيب كوباية من اللي فيها
شفاط.
وتحط فيها ميلك شيك...لبن مضروب مع أي
فاكهة...أو كاكاو أو خلافه...وحطي لهم شوية ثلج...ودلعيهم.
وممكن تحطي لهم آيس كريم نضيف...من
غير مواد حافظة وبلاوي.
غالي عليكي...تقدري تعملي أنت آيس
كريم...وهيبقى أنضف.
من القواعد المهمة في التغذية...إنك
تخلي الطفل ما ياكولش الحاجة الحلوة قبل الوجبة الرئيسية مباشرة...لازم ياكل أكله
الأول.
وممكن أثناء اليوم تدلعيه بشوية
فاكهة...شوية كوكيز...كوباية عصير...أي حاجة تجودي بها.
بس مش قبل الوجبات الرئيسية بمدة
قصيرة...علشان نفسه ما تتسدش.
طب خالتهم بتجيب لهم حاجات غصب عني.
هو حضرتك قاعدة في البيت كيس جوافة
مثلا؟
أطلبي من الناس ما تجيبش حاجات من دي
علشان مش صحية.
الناس هتزعل...! يا ستي طفلك أهم من
الناس...اللي يزعل يزعل.
وعلمي أخواتك وصحباتك هم كمان يعملوا
الأكل والشرب زيك.
بحيث المجموعة اللي حواليكي كلها
تتغير للأفضل...علشان خاطر صحة أطفالكم.
عموما القاعدة العامة اللي زوجتي
مطبقاها في البيت...على الصغير والكبير - أنا الكبير ده -...ما فيش أكل مُصنع.
سواء شيبس...مياة
غازية...لنشون...بلوبيف...بسطرمة....وما شابه.
وزوجتي بتعمل يوم من غير لحوم ...يوم
للخضار بس.
آه يا حوستي السوداء أنا يا أمه...
وكنت لسه سامع إن فيه مدارس في أمريكا
بدأت تعمل يوم في الأسبوع لأكل الخضار بس.
وجابوا أفضل طباخين في المدينة علشان
يعملوا أشكال مثيرة ووجبات لذيذة تشجع الأطفال على الأكل.
أيوه...دي المدارس الحكومية حضرتك.
أيوه ...دي الوجبات المدرسية !
جاتنا نيلة في حظنا الهباب.
مهم قوي تعرف الطفل سبب منع
الحاجة...حتى لو مش هيقتنع.
علشان يتعود على النقاش والأخذ
والرد...مش عايش في معسكر أصله.
كل مرة تمنع الحاجة تقوله السبب.
وممكن تبرمجه إنك تحكي له...قصة
الفيروسات اللي بتهاجم الجسم...والجنود اللي بيحرسوا الجسم ضد الميكروبات
والفيروسات الوحشة.
فيا حبيبي لما أنت تاكل الحاجات
الوحشة...بتخلي جنودك يضعفوا...وهيتهزموا.
ليست هناك تعليقات:
إرسال تعليق